Rekordando Wéchi!

Djis p’abou di Zegu na bo man robes

Bo ta haña plantashi Wéchi, einan mes.

Un lugar ku a laga hopi rekuerdo keda tras

Di den mi hubentut, ku lo no bolbe nunka mas.

Den bak’i pikòp di Zjizji tur tra’i mèrdia dos or

Entre kanik’e lechi i kumind’e porko ku mal olor

Nos tabata hinka rumbo p’abou, largu pa Wéchi

Ku su porko, kabritu, karné i bakanan di lechi.

Kada baka tabata reakshoná riba su nòmber

I na Clará nos tabata bai piki kòmkòmber.

Zjizji su yunan Ciro, Selvio i Tani e chikitu

Semper tabata atendé e galiñanan ku nan puitu.

Zjizji tabata meskla ariña den hèmber pa kada baka

Pasobra ta di nan lechi, e tabata haña su dòs plaka.

Su porkonan tambe tabata bon gordo, yen di sebu

I tur dia ta’ta fula e galiñanan si nan ta’tin webu.

Atardi nos tabata bai mondi pa hunta karné i kabritu

Pa nan tabata den kurá promé ku a bira sukuritu.

Mi ta kòrda tambe e landhuis ku su bèl di katibu

Ku nan tabata bati tempu e pobernan tabata bibu.

Wéchi, un paisahe bunita asina sin komparashon

Méster bira di bèrdè mes un lugar pa konstrukshon?

No por kombirti’é den un parke di naturalesa

Unda nos por rekreá i gosa di un aire ku puresa?

Zehi Metry

8-12-‘98